純廢話（其實篇篇都係廢話⋯⋯）
～～～
近排大家都有睇個幅Intern成包A4紙唔拆就入影印機嘅圖。琴日聽電台講開呢幅圖，個嘉賓話有次個InternFax幾十次同一頁嘅紙比對方，對方打嚟鬧。原來Intern覺得Fax咗張紙之後，張紙係應該唔見咗。好似send email跟住封信會飛走咗一樣。佢見架Fax機嘔返張紙出嚟就以為Send唔到，所以無限輪迴Fax幾十次。我哋覺得佢白癡，人哋後生未見過fax機你吹咩老餅？
嗱，唔好話我唔提你。依家七月頭，大家求神拜佛身體健康，唔使入公家醫院。因為新一季嘅實習醫生又上場。我唔係話我自己捱完實習就過咗海係神仙。不過諗返起一張白紙咁俾人推火坑到乜都唔識，啲病人都真係幾牙煙。
第一次要幫個阿婆抽動脈血ABG。佢見我手騰腳震唔肯比我抽。大我第一年嘅醫生過嚟鬧佢，話唔俾個實習幫你抽就無人幫你抽㗎啦，咁你抽唔抽啊？咁個師姐就陪我教我點抽血。當然對我來講好有幫助，但係站喺病人角度就好慘囉。人哋病入院唔係過嚟俾你做白老鼠㗎嘛。我知啊，我明啊！但係個制度係咁所以冇辦法。不過依家有抽血姑娘，病人應該幸福啲嘅。當然除咗抽血之外，仲有好多大大小小Management都會牽涉到一個毛毛經驗嘅實習醫生。例如睇過一兩次抽肺水/抽肚水/攞組織/抽骨髓等等，你就要落手自己做。 老一代成日講 see one, do one, teach one。好恐怖啊呵？做外科嘅實習仲要入埋去手術室幫手添。我做婦科實習嘅時候係幫手剖腹生子嘅時候推BB出嚟架。💪🏻💪🏻💪🏻💪🏻💪🏻💪🏻
Any肥，雖然實習已經距離我好耐時間，但係近排有個朋友考醫生個海外執業資格嘅試。喂，唔好小住。人哋唔係強國醫生，係做咗10年北美嘅醫生，出論文無數。返黎香港一家團聚，當然香港稅率都好吸引。佢咁勁考試當然冇難度。之後佢要喺香港實習六個月補返外科Rotation。同佢商量揀實習做邊間好。好有緣份地佢入咗我好友個Team。有人照應係好啲嘅。我問佢有冇野想問，佢好搞笑問我係咪要請姑娘食嘢？我話你唔想死嘅，當然係請啦！😂😂😂😂
話咁快佢就返左2日工，仲要已經On call 左30+小時。我估對佢來講香港醫療制度同架構幾難適應。同埋人地30+歲人，30+鐘唔瞓覺如過係我，我會覺得好辛苦。我愛周公！所以我覺得佢好勁，咁都要考咁都要返嚟香港做。俾着我就唔會，所以我逼住要留喺香港，去唔到第度，返唔到家鄉。😭😭😭😭😭
～～～
我呢個禮拜淨係返兩日半工哈哈哈哈哈！！今日睇咗早場嘅Antman 2。買飛嘅時候朝頭早8:45 , 9.9 , 10.9都已經有一半嘅人買咗啦。我買12點半果場，剩返第一項係急嘅。呢個世界原來有好多人都唔使返工架。唔係個個都係o靚仔唔放暑假唔使返學喎～～～
BTW，最尾等第二條彩蛋嘅片我奉勸大家唔使等，睇完第一條就走唔該。
～～～
我忍左好耐先至搞杯咖啡，睇住佢沉好慘😰😰😰😰
Search